تــــــــــ تاني ــــــاج

نظراً "لحكم القوي على الضعيف"، والصداقة والذي منه، أجد نفسي أمام (تاج) عنيف، مليء بالاسئلة زي مايكون امتحان، وطبعا لازم أجاوب، عشان احتمالية التهزيق تقل

مررتهولي "ريهام العربي" من مدونتها "همسة حب"

وهي صديقة غالية، ماينفعش أرفضلها طلب :)

اسمك؟

آية غباشي

المشهور بيه وسط أصحابك؟

هو الحقيقة في ناس بتقول عليا دماغ عاليا، زي "واحدة" من زميلات الثانوي، اللي قالتلي انتي دماغ عالية

بس أغلب الناس بيقولوا عليا طيبة الحمدلله

سنك؟

20 سنه

مجال دراستك؟

اللغة اللأسبانية، كلية الألسن جامعة عين شمس

اسم مدونتك؟

أخت القمر

صورتك الرمزية فى المدونة بتعبر عن ايه؟

بتعبر عن بنت حلوة حزينة شوية، باصة للقمر... ده لأن انا من عشاق القمر، عشق غريب يعني، والبنت هي جزء من نفسي

هل فكرت فى اغلاق المدونة ؟ والسبب؟

الحقيقة مفكرتش أقفلها، لان معرفش بتتقفل ازاي، لكن جه عليا فترة أهملتها خالص، وبالكاد نسيتها

إيه رد فعلك لو حد قل أدبه فى تعليق ؟

هرد عليه ببرود، وشوية همسحه خالص

اسوأ مدونه؟

لا مشفتش أسوأ مدونة، لأن اساساً خبرتي في المدونات محدودة جداً، بس ساعات في بوستات مبتعجبنيش

هيحصل إيه للايميل بعد ماتموت؟

مش عارفة الحقيقة، بس انا سايبة الباسوورد بتاعة مع انتيمتي، لو جرالي حاجة هي هتفتحه، توصل للناس اللي عليه اني خلاص مبقتش موجودة، وفي الأخر أغلب الظن انها هتسيبه لحد ما يتلغي لوحدة

اديت الباسوورد لحد قبل كدة؟

أيوة، أنتيمتي، والانسانة الوحيدة اللي بثق فيها ثقة عمياء، بعد أمي وأبويا

السفر بالنسبة لك ايه؟

السفر كمصطلح، حاجة جميلة جدا، انا سافرت برا القاهرة، بس مش برا مصر، معرفش العالم من برا شكله عامل ازاي، بس فعلا نفسي ألف العالم كله

الموود بتاعك ايه ؟

مش ثابت، بس أغلب اللأحيان بيبقا تتنيح شوية، بمعنى ان ممكن حاجات صغيرة كده تزعلني، مش من اصحابي، لكن مثلا قصة حزينة، فيلم حزين، يعني الحاجات دي ليها تأثير كبير في حالتي النفسية، كمان لما ساعات بحس بالوحدة، أعصابي بتتعب، فتلاقيني متنحة كده أغلب الوقت

وفي المضاد، ساعات بهيس بشدة، وبضحك واضحك الناس بهيستيريا

بتعمل ايه فى وقت فراغك ؟

بقعد على النت، أفتح صفحات، واعمل شات

او بقعد مع أمي نعمل اي حاجة

الأكلة المفضلة ؟

البطاطس بكافة أشكالها، والفراخ البانية

وكمان المكرونة بالطماطم

الصفات التى أخذتها من والدك؟

مش كتير اوي، بس أخدت منه العند، ونشوفية الدماغ، وشوية من الصبر، وقدرة الرد على الناس الغلسة بهدوء نوعاً ما، بس أبويا عنده صبر انه يتكلم بهدوء، من غير ما يطلع منه كلامه يعيبه، انا ساعات لأ، بطلع كلام شديد، ومعنديش صبر اوي

الصفات التى اخذتها من والدتك ؟

ماما تقريبا كل حاجة، بداية من تدويرة الوش، حتى كتير اوي من الاخلاقيات والطيبة والأمومة، وما اللى ذلك، حتى تاريحها وتاريخي واحد باختلاف الاسامي والاشكال

بس طبعا هي أهدى مني، وأعقل مني بكتير، وفيها حتة الصبر على تصرفات العيال وطولة اللسان دي اوي، صير مدهش يعني

انا لأ... خالص

اكتر ست حاجات بتكرههم ؟

1. الغرور

2. الوحدة

3. ان حد يتكلم قدامي في حاجة انا مش فاهماها

4. ان حد يصمم على ان رأيه هو اللي صح بدون وجه حق

5. التريقة الزيادة عن حدها

6. ان حد يحرجني قدام الناس او يقول سري لحد

اكتر ست حاجات بتحبهم ؟

1. الفكاهة

2. المشي

3. القمر

4. الشات

5. حب الناس وخدمتهم

6. احساسي باللي حواليا واحساسهم بيا

شخصيتك نوعها ايه ؟

لا الحقيقة معرفش، أسيب الناس هي اللي تقوللي عن شخصيتي

لماذا دخلت عالم التدوين من الاساس؟

الكلام ده كان من زمان اوي، لاني اساسا مكنتش فاهمة ده عبارة عن ايه، بس أعتقد على قد مانا فاكرة، ان حد من اصحابي عملها وانا عجبتني الفكرة، ومشيت فيها

احلي جملة قيلت فى وصف مدونتك؟

لا متقاليش حاجة على المدونة غير ان شكلها جميل

بس اتقاللي على البوستات نفسها

احلى بوست كتبته؟ ضع اللينك ثم اذكر لماذا؟

(عيناي لا تكذب)

لانه معبر اوي عن حالة نقسية كانت سائدة عليا اوي ساعة لما كتبت البوست

ولان كلماته رقيقة، والوصف فيه فعلا بيحركني من جوا

(ستري الدنيا بعيناي، حبيبتي)

وده لأنه تعبير عن الفيديو الجميل بتاع الشاب الكوري اللي بيعمل مصوراتي، اللي أعطي لحبيبته أغلى ما يملك، نور عيناه... وهي اللي افتكرت انه بعد عنها لانه افتكر انها فقدت نظرها

الحقيقة انه ضحى تضحية رهيبة، وبعد عنها عشان مايسببلهاش ألم او ندم

وهو ده اللي البوست بيعبر عنه

افضل مدونة قرأتها؟

لأ مافيش أفضل مدونة، المدونات حلوة حلوة، في بوستات تعجبني وبوستات لأ

افضل بوست قرأته؟

مش فاكرة افضل بوست، بس في بوست لزميلة اسمه (رسائلي إليه) من مدونة (قطع السكر أحيانا لا تحلي)

الشغل بالنسبة لك ايه؟

هو محاولة للوصلو لهدف، أيان كان الهدف اللي كل واحد بيسعى ليه حسب خبراته وتربيته

الانترنت بالنسبة لك ايه؟

حياة تانية، الى جانب الحياة العادية اللي احنا عايشينها

تمرر التاج ده لمين ؟

لــ (همس القلب) ومدونتها (قطع السكر أحيانا لا تحلي)

(لؤلؤة) ومدونتها(لؤلؤة مصرية)

(توتة) و مدونتها (شخابيط)