اسئلة تاج

بناء على طلب صديقتي الاء - اللي دبستني في موضوع التاج ده - أجد نفسي مضطرة اني احله علشان مزعلهاش

نبدأ الاسئلة:



أعطيتك ثلاث وردات .. من هم الثلاث أشخاص اللى هتهديهم الورد اللى معاك ؟؟
((si te doy 3 flores, ¿a quién vas a regalarlas?))

الوردة الاولى لأمي، اللي أعتقد لو لفيت الدنيا مش هلاقي زيها اتنين
الوردة التانية مناصفة بين صديقتي المكسيكية مونسيتا وصديقتي المصرية دعاء
الوردة التالتة لخالي العزيز، وعيلته الصغيرة (زوجتة واولاده وحماته)

لو أعطيتك ورقة بيها 3 سطور فقط و قلت لك أكتب فيهم اللى أنت عايزه هتكتب إيه ؟؟
((si te doy una hoja que tiene tres lineas, ¿que vas a escribir en esas lineas?))

السطر الاول: وحشتيني يا تيتي، ربنا يكتبك من أهل الجنة
السطر التاني: اللهم أحسن ختامنا، ويسر حسابنا، وأكتبنا مع الشهداء والصالحين
السطرالثالث: القلوب بين اصبعي الرحمن، يقلبها كيف يشاء

ما هو هدفك فى الحياة ؟
((¿ cuál es tu objetivo en la vida? ))

الحقيقة هدفي لحد دلوقتي اني أسعد امي، واقوي لغتي، ونفسي اتعلم لغات كتيييييييير واشتغل في شركات السياحة، وأحس ان مهنتي ليها معنى وان في حد بيستفاد منها، علشا أخد ثوابها عند ربنا وادخل الجنة. نفسي اتعلم الالماني والروسي والايطالي والعبري. وباقي اللغات بس دول اهمهم

إن شاء الله بكرة هيكون أحسن من النهاردة "هل تصدق هذه المقولة ولماذا؟؟
(("Insha Allah mañana será mejor" ¿crees en este dicho? y ¿por qué? ))

المقولة دي أصدقها من حيث انها بتعطي أمل، ومع الثقة الشديدة في الله وفي النفس، أكيد بكرة أحسن من النهاردة... رغم انها من الناحية العملية، مش دايما صحيحة

أجمل مقولة سمعتها فى حياتك ؟؟
((¿cuál es el mejor dicho que nunca has oido?))

انك لا تهدي من احببت ولكن الله يهدي من يشاء

من المغنى اللى بتحبه أوى ؟؟
((¿quién es tu cantante favorito?))

عبدالحليم حافظ، بلا منازع

و إيه أحلى أغنية بتحبها ؟؟
((¿cuál es la mejor canción que prefieres?))

أغنية اسباني اسمها Sin miedo a nada

غزة " تمثل لك إيه فى حياتك ؟؟
(("Ghaza" ¿qué significa esa palabra en tu vida? (Ghaza es una ciudad palestina)))

صبر طوييييييييييييل، وكفاح سنين، وسكوت على الحق والظلم، والوحشية وقهر الحرية

أعطى لإنتمائك لوطنك درجة من مائة ؟؟
((da a tu patriotismo un precentaje))

100%
انا على قد ما بحب بلدي، على قد ماهي صعبانة عليا، وعلى قد مانا مش عارفة الطريق هيوديها لحد فين
وبتمنى ييجي اليوم اللي كل اللي احنا فيه يتغير، ومصر تبقا احسن بلد في العالم، زي ما كانت طول عمرها

لو تزوجت و أنجبت بنتين و ولدين أى الأسماء تختار لهم؟؟
((si te casas y tienes 4 hijos, 2chicos y 2chicas, ¿qué nombres eliges para ellos ?))

البنات: ياسمين و حبيبة
الولاد: فارس و محمد

عمرك غشيت في امتحان وانت صغير؟؟
((¿has hecho una trampa en un examen una vez en tu vida? ))

افتكر اه، على ما أتذكر، بس كنت صغيرة اوي، ابتدائية او حاجة، بس بعديها لا، معادش

لو أتعرض عليك رشوة كبيرة و انت فى زنقة مالية هتعمل إيه؟
((si alguien intenta sobornarte, y tu tienes un caso economico mal, ¿qué vas a hacer? ))

هستعين بالله، وهحمده، لان هو وحده اللي قادر يخرجني من الزنقة المالية، وهتقيه اوي، لان جايز الفلوس الحرام بدال ما تساعدني تتعسني، مش في الدنيا بس، في الاخرة كمان اكتر

قول 3 صفات ب 3 كلمات بس توصف بيهم شخصيتك؟
((dí 3 adjetivos en 3 palabras en tu caracter mismo))

صبورة
حساسة
خيالية

صفة عايزها في شريك حياتك؟
((dí un adjetivo que quieres tanto en tu novio))

انه يكون حنين ومتدين ومتحمل للمسئولية

ايه المجال اللى غير دراستك وشايف نفسك فيه قوي؟؟
((¿cuál es el campo que te gusta mucho, aunque no es de tus estudios? ))

لا مافيش، انا ربنا رزقني بأنسب حاجة ليا

بتحب السفر ؟؟
((¿te gusta viajar ?))

مش دايما، في حالة لو المكان جميل ومناظرة الطبيعية خلابة زي ما بنسمع، أكيد هبقا عايزة افتح عيني واغمضها واكون هناك، بس مش حاجة ضرورية اوي في حياتي

طب دلوقتى حالا ايه المكان اللى نفسك تكون فيه ؟
((¿ahora mismo, cual es el lugar en el que te gustaría estar ?))

المكسيك

تمرر التاج ده لمين ؟؟
((¿a quién pasas este tag?))

لصديقتي من تشيلي: خيمنا
a mi amiga chilena: Ximena

أميرة كوني

لو انك الفيتِ الدنيا يا حبيبتي،

Si imaginaste la vida, mi querida,

بستان وارف الظلال...

Como un huerto sombrío…

فستجدي نفسك زهرة يانعة،

Te encontrarias como una flor madura,

تضفي على البستان بهاء يشرق في النفس كشمس الأمل...

Que presta al huerto su hermosura, que brilla en el alma como el sol de la esperanza…

معها تنقشع غيوم اليأس والاحباط،

Con él, las nubes del desaliento y la frustración se disolvieron,

شمس الأمل التي تضيء جبهتك البيضاء...

El sol de la esperanza … que ilumina tu blanca frente…

ونور عينيكِ المتقد،

Y la luz ardiente de tus ojos,

وبريقه الذي لا يخبو مع أشد الاحزان وطئة.

Con su brillo que nunca empeña ni delante de las mas dificiles tristezas.

يا حبيبة حياتي...

¡Oh querida de mi vida!

قلما وُجِدَ عبر الزمان من هو في حنوك

Raramente se encuentra a esa edad, alguien que tiene el mismo cariño como tú

وقلما عُثِرَ على سريرة في نقاء سريرتك...

Raramente se encuentra un interior, con la misma pureza tuya...

فأنتِ في خيالي كنهر فضي من أنهار الفردوس،

En mi imaginación, eres como un río plateado de los ríos del paraíso,

تنعكس عليه واجة القمر الممتليء،

Se refleja sobre él, la cara de la luna llena,

فأشعر به يفتح ذراعه، لكي أقفز فيه...

Y le siento abriendo sus brazos, para abrazarme…

واستكين....

Y tranquilizarme....

وكأنني بين ذراعيكِ انتي يا حبيبتي،

Como si fuera en las manos tuyas mi querida,

ثم تطفر عيناي بالعبرات...

Y entonces, mis ojos echan a llorar…

كم التهب شوقي للحظة لقاء كهذه!!

¡Cuánto me quema mi anhelo por un momento de encuentro como este!

كم سهد قلبي بإنتظار عطرك الحاني، ولمسات يديكِ الناعمة، التي تزيل عني جروح يومي وغدي!!

¡Cuánto desveló mi corazón esperando tu cariñoso perfume, y el roce de tus suaves manos, que me quitan los daños de hoy y mañana!

يا سيدة كوني...

¡Oh La dueña de mi universo!…

بحياتي أنتِ مليكة متوجة،

En mi vida eres una reina coronada,

قلبي عرشك،

Mi corazón es tu corte,

و كل ما حوله رعاياكِِ،

Y todos los alrededores, son tus devotos,

فقد امتلكتِ مني ما لم أمتلكه انا من نفسي.

Eso por que, has poseido de mi, lo que nunca había poseido yo

اليكِ... أهدي قلب مخلص محب...

A ti… regalo un fiel y amable corazón...

أتعسته ليالي الشتاء،

Le hicieron miserable, las noches del invierno,

وحطمته أيام الصيف،

Y le rompieron los días del verano,

ثم أحياه ربيع حبك من جديد،

Y después, le resucitó la primavera de tu amor,

فكأنما كل ما ولى.... كإن لم يكن.

Y todo lo pasó… como si fuera nada.

حبيبتي الغالية...

Mi preciosa querida…

عندما تجدي نفسك وحيدة في دنياكِ...

Cuando te encuentres sóla en tu vida…

عندما تلفظك الحياة بعيداً بعيداً الى متجه مجهول....

Cuando te arroje la vida a lo lejos a lo lejos, hasta una anónima dirección....

عندما تعاني قسوة الزمان على رعاياه...

Cuando sufras la dureza de la edad a sus devotos…

تذكريني...

Recuerdame…

وانظري في المرآة،

Y mira el espejo,

فستجديني أحتاط بكِ بين ذراعي،

Vas a encontrarme rodeandote entre mis brazos,

وأضم رأسك الصغير على صدري،

Y apretando tu pequeña cabeza a mi pecho,

حتى يسكرني عبير خصلات شعرك المتطايرة،

Hasta que me embraigue la fragancia de las cerraduras voladas de tu cabello,

ثم أقبل جبهتك المحببة الى نفسي،

Y entonces beso tu frente querida de mi alma,

وأشدك من يديكِ لتنظري الى القمر...

Y te traigo de tu mano para que veas la luna…

انه يتوارى خلف السحب خجلاُ من عيناكِ الجريئتين،

Está oculta de timidez ante tus aventureros ojos,

و البسمة المنطبعة على قلبك الذهبي،

La sonrisa fija en tu dorado corazón,

وبهاءك الذي لا يعادله بهاء...

Y tu belleza, que no hay otra que la iguala…

وعندئذ...

Y entonces…

ستجدين نفسك ابتسمتي،

Te encontrarás sonriendo,

وستنزاح احزانك جانبا مع نسمة الهواء الرقيقة الرطبة،

Y se van a poner al lado tus tristezas, con la blanda humilde brisa,

التى أتت من بعيد بأقصى سرعتها،

Que se corrió desde lejos con todas sus esfuerzas,

لتربت على وجنتيكِ وكأنها تقبلك قبلة المساء،

Para acariciar a tus mejillas, como si fuera a besarte el beso de buenas noches,

ثم تعبث بخصلات شعرك، فتنفض عن رأسك اي أثر باقي للحزن،

Y después, juega con las cerraduras de tu cabello, y quita cualquier efecto de tristeza,

فكيف يا حبيبتي يجد الحزن لنفسه مدخلاً في قلب ملاك مثلك؟

¿Cómo mi querida, la tristeza encuentra un lugar en el corazón de un ángel como tú?

حبيبتي حبيبة حياتي....

¡Oh mi querida! Y la querida de mi vida…

سآتي اليكِ يوماً....

Vendría algún día para ti…

أنشد ... أغلى ما أنشد ...ان أكون قريباً منكِ،

Deseando… el más precioso deseo… estar a tu lado,

ان اراني بين يديكِ،

Que me vea entre tus manos,

وفي عينيكِ،

Y en tus ojos,

تموج الفرحة للقاءي.

Ondea una alegría para encontrarme.

وهاك الزمان قد أعطاني،

Y ya esa edad me dio,

أكثر مما احلم وأتمنى... وما أتمنى ... أكثر من ان يبقيكِ الله لي سالمة من غير سوء...

Más que lo que he deseado y he pedido… y no deseo nada sino que Allah te guarde sana sin niguna falta, para mi...

شمعة وضاءة...

Una iluminante candela…

تنير كوني...

Ilumina mi universo…

يا أميرة كوني.

Tú, la princesa de mi universo.

أخت القمر

Hermana de la luna

7-6-2008

عيناي لا تكذب

يا قومي لا ترموني بنظرات الاستنكار والعتاب، ولاتندهشوا لما آل اليه حالي

فالقناع الذي ترونه لا يلبث ان يقفز بأقصى قوته

حينما يهلك من الزيف

من البسمة التي لا يملكها القلب

من الايماءة التي نحت جانبا همومها لتصغى لهموم غيرها

ان الحياة بداخلي ممددة تحت الاقدام

تعاني سكرات الموت

تخنقها العبرات التي تركت لجوادها العنان

فاسرعت تتساقط في نهر لا يجف

الى... بحار الفرقة والوداع

ياقومي انظروا بداخلي

أما رأيتم القمر منكسرا؟؟

الم تروا من قبل السماء شجية، حطمتها الرياح العاتية؟؟

هل سمعتم عن الأم التي انتظرت طفلها اعوام واعوام

وعندما جاء...

رحلت هي عن الحياة، وتركته وحيدا يصارع دنياه ليبقى؟؟

هل شاهدتم يوما جرحا دامي يصرخ من الالم..

من دمعة حزينة

من عين يهاب الفؤاد فراقها؟؟

هل نظرتم؟

هل رأيتم؟

والان انظروا الى وجهي...

وابكوني!!

ابكوا حريقي الذي نشب بين حنايا صدري

وابكوا بسمتي المقهورة

التي عاندتني وظهرت على وجهي

ثم في النهاية...

ابكوا قلبي الذي حطمني وقسى علي

ابكوا الحياة الفقيدة لمن تنادي

يذهب الاحباب الى حيث يشاء الله

ونبقى نحن...

نبكي ونبكي ونبكي

منا من يبكي لوعة الفراق والحرمان

ومنا من يبكي للندم الذي عاش ينهش صدره

ومنا من يبكي ولا يبكي...

يبكي قلبه، ويندب حظه العثر، الذي رماه في دنيا بلا قلب

ولا تبكي عيناه، فالدموع جفت، وذهب من نحب الى حيث لا ندري

أعرفتم يا قومي من انا؟؟

انا البسمة الحزينة على فم الطفل اليتيم

وانا ايضا البسمة السعيدة على شفاة الام الحنون...

انا العَبرة التي ذُرِفت بحرقة لحظة الوداع

وانا هي التي جادت بها العين لحظة اللقاء...

انا دنيا محطمة، قعيدة، وسمها الزمان ما عَرِف من شتى المتناقضات...

انا التي اذا رأيت الحب بعيني ابتسمت، واشتد بي الشوق الى لحظة حب

وانا التي عندما تأتيني فرصة حب، افر من أمامها الى عالم آخر بعيدة عنها...

لا أريدها!!! أهابها!!!

لن أحتمل ضربة جديدة فوق عنقي!!

لا...لا... لن أحتمل

الان...

الان أضع قناعي على وجهي

أصبغ عيني وشفتي بالضحكة

وتكذب شفتي وتضحك

ولكن...

عيناي لا تكذب

أخت القمر

كلمتين على جمب

بصراحة ملقتش غير الصورة الرائعة دي للفنان ايمان المالكي علشان اعبر بيها عن الموضوع اللي عايزة اتكلم فيه

هي الصورة اسمها
Dangerous game
يعني اللعبة الخطرة

وأعتقد انها ليها علاقة كبيرة اوي بالموضوع

الموضوع اللي شاغلني وبفكر فيه بقالي مدة بيتحدث عن المشاعر الانسانية
طبعا محدش شايف ان في علاقة مابين الصورة والمشاعر الانسانية
بس صدقوني
لو ركزتوا هتلاقوا الاتنين زي بعض

يعني، الصورة بتعبر عن الولد اللي باصص للبراد من بعيد ويدوبك ماسك الغطاء
وهي دي المشاعر الانسانية
بتخاف تقربلها لا تغلط
بتحسس عليها علشان هي اصبحت مصدر للنكد او مصدر للسعادة

لو فهمت حد اوي، وقررت تعملله اللي هو بيحبه، هتبقى مسيت مشاعره وخليته سعيد
ولو جت لحظة عمل موقف انت مفهمتوش فاتفاعلت معاه غلط هتئذي مشاعرة وبالتالي بقت مصدر للتعاسة

بالظبط هي دي النقطة

المشاعر بإيدها تفرح حد وبإيدها تزعله
وعلشان كده تخاف تقربلها زي الولد ماهو خايف يقرب من البراد

انا هتكلم عن قصة صغيرة
يمكن حسستني اوي بمعنى الكلام اللي بقوله ده
وكمان اصلي لسه قارية كتاب للـ د/ شريف عرفة، واسمه: لماذا من حولك أغبياء
والكتاب ده بقا أكدلي قد ايه المشاعر الانسانية صعبة الفهم
وصعبة التعامل معاها

الكتاب بيوصف الناس والطريقة اللي بيفكرو بيها والاختلاف الجزري في طريقة تفكير الراجل وطريقة تفكير الست، وكيف تفهم من حولك.... و و وكلام كتير، جمييييل ورائع الحقيقة
بس.... صعب
صعب اني احط في دماغي اني اراقب حركات عينين الناس، وبالذات اللي قروا الكتاب ده
صعب ان الواحد يبقا حاطط في دماغه طوال الوقت ازاي مايزعلش الناس اللي حواليه
وازاي مايعملش غير الحاجة اللي تفرحهم
وازاي يفهمهم ويعاملهم زي ما هم يحبوا يتعاملوا.... و كلام كتير من هذا القبيل

قبل ما اقرا الكتاب ده، كنت بعمل زي الولد ده
بخاف ازعل اي حد
بحب الناس كلها وبساعدهم
وبتلطف اوي في حاجات كتير
ويمكن كان مصدر تعاسة بالنسبة لي
اه الناس بتفتكرلي الطيب، لكن كتر التلطف مع الناس، وتعدية اي كلام بيقولوه سواء كان كلام وحش او حلو
قلب الدنيا على راسي
ده لاني اكتشفت ان في ناس محتاجة ان حد يقوللها لا
وفي ناس محتاجة ان حد يكسر جبروتها من جوا علشان تبطل افترا
وفي ناس محتاجة ان حد يفوقها باستمرار علشان ماتستمرش في غلط معين ماشية فيه
وفي ناس عكس كل دول، ليها شخصية عندية، ماتحبش اللي يعارضها ويقوللها لا
وبتمشي بمزاجها، وتكره اللي ينصحها او حتى يذكرها بحاجة
و و و ...... الخ، نوعيات الناس لا تعد ولا تحصى

التجربة اللي انا مريت بيها مؤخرا اكاد اكون لحد دلوقتي مش فاهماها اصلا
ولو فاهمة سر اللي حصل
وللا سر اللي بيحصل دلوقتي

هحكيلكوا حكاية صغيرة
وطبعا هحكيها زي مانا شوفتها
بغض النظر اذا كان في وجهة نظر مخالفة

كان في اتنين اصدقاء، اتعرفوا على بعض في سنة من السنين
فضلوا مع بعض سنتين كاملين
يكادو يكونوا فهموا بعض الى حد كبير
بس اللي حصل غريب ان واحدة منهم بدأت تصدر تصرفات غريبة
يمكن مش غريبة ليها هي
بس كانت غريبة للطرف التاني
وهنا تبينلها حاجة مهمة اوي
انها.... عمرها ما فهمت صاحبتها صح
لانها ببساطة لو كانت فهمتها، كانت عرفت ازاي تتعامل معاها في اوقات معينة
بتظهر فيها تصرفات غريبة من البنت التانية
مش تصرفات غريبة يعني مجنونة يعني، لا تصرفات غريبة بحيث ماتبقاش عارفة يا ترى، التصرفات دي معناها ايه؟؟
يا ترى البنت مش بتحبها او هي مش فارقة معاها، او مش عاجباها شخصيتها؟؟؟
ياترى عملت حاجة ضايقتها وهي مش واخدة بالها؟؟
ياترى .. ياترى... اسئلة كتير فضلت تدور في راسها
والحل الوحيد اللي قدرت توصلله
بعقلها اللي مش لاقي تفسير غيره
ان البني آدم مابيعرفش قيمة الناس اللي لما بتبعد عنه
يعني النهاردة هم اصحاب، لكن صاحبتها ببتعامل بشكل افضل مع الناس اللي مش بتشوفهم كتير
والناس اللي بقالهم سنين بعيد عنها
يمكن لما الزمن يفرق بينهم
توحشها او تتعامل معاها بطريقة مختلفة
والحل التاني الاهم
انها عمرها ما فهمتها
وان يستحيل الانسان يفهم انسان تاني في ظرف سنة وللا سنتين وللا حتى عشر سنين

ايه رأيكوا في القصة؟؟
الاحسايس فيها متضاربة مش كده؟
البنت احساسيسها كتير، ومش لاقية مخرج
والبنت صاحبتها، لا اشك، عندها برضو احاسيس متضاربة وفي حلقة ناقصة بينن الاتنين

زي ما قلتلكوا، عايز تتعامل مع الناس لازم تحط عينك في راسك
لانك ممكن بسهولة جدا تجرح حد من غير ما تقصد
والجرح اصعب من المداواة

الموضوع طوييييييل ومحتاج كتب كتيييير وايام اطول علشان الواحد يشرح فيه باستفاضة

والنهاية، هتكتشف انك عمرك ما فهمت حد انتي اتعاملت معاه قبل كده
ولا عمرك هتعرف تفهم شخصية حد على طبيعتها

يمكن في يوم، لما الواحد يتجوز، ويعاشر الطرف الاخر سنيييين وسنيييين، ساعتها مكن 50% تفهمه
وهتلاقي ساعات حاجات بتطلع وتصرفات غريبة
مش هتعرف تصنفها
ولا هتعرف تحطها تحت خانة معينة من تصرفات الطرف الاخر

انا والشعب المصري....والمترو 2

نخش على الجزء التاني...

كنت قلت اما بدأت اتعصر جوا المترو براحتي

ده طبعا مع زوق الناس اللي جوا المترو، واللي بيحبوا بعض جدا زيادة عن اللزوم

يعني مثلا، ادخل الاقي اتنين (ستات) عمالين يشتموا في بعض شتايم صعبة اوي، ووصلت في الاخر انهم ضربوا بعض

وكل ده والدنيا حر

والمترو خنقة على الاخر

عجبتني بنوتة اوي كانت واقفة في مرة اثناء واحدة من الخناقات دي
اول مالقت الموضوع هيوسع راحت علت صوتها اوي وقعدت تقرا قرآن بصوت عالي
شوية وحصلت المعجزة والناس هديت خااااااااالص!!! سبحان الله

المهم دخلت انا المترو بقا، محدش مستحمل حد، والناس عمالة تقول ماتزوقوش لو سمحتوا، وقال ايه، اتاخري شوية لو سمحتي!!!!! اتاخر فين اذا كنت اصلا مش عارفة اقف كلى على بعضي في حتة واحدة

يعني جسمي في حتة ودراعاتي بالشنطة في حتة، ورجلية في حتة تالتة

والا بقا الناس اللي مع الزحمة دي كلها وتكدس البشر فوق بعضيهم، قاعدين في المترو!!!! زي مانكون قاعدين في قاعة رقم 304 في قسم اسباني في كلية الالسن

وبيصعبوا عليا اوي الناس اللي شايلين على دماغهم حاجات تقيلة اوي!! ومش عارفين حتى يسندوها جمبهم على الارض!! هنعمل ايه، حكم القوي

واللي فات كله كوم، وعملية الخروج من المترة كوم تاني

بما ان الناس اللي بتروح اشغالها في الوقت ده بينزلوا متأخرين، فما بيصدقوا يركبوا، ويقعدوا جمب النملة الصغيرة في الحفرة بتاعتها بين الشقوق
ولنفس السبب ما بيصدقوا يلاقوا الباب اتفتح فيجروا جري علشان ينزلوا
واللي يقع يقع، واللي يداس يداس، يعني... الضرورات تبيح المحظورات
والغاية تبرر الوسيلة
وهنا بقا شد انتباهي 3 حوادث انقح من بعض

اولهم في مرة كنت مستنية حضرات الركاب لما يركبوا او بمعنى اصح لما يزقوا ويزنقوا نفسهم بغرض ان الباب يقفل عليهم -تقريبا- فلاقيت بنت الباب قفل على ايديها وبقوا كل الستات اللي وقفين يصوتوا.... لان البنت نفسها كانت برا وايديها مقفول عليها
وغالبا اللي حصل ان ولاد الحلال شدوا الباب بعزم ما فيهم فاتفتح ونجت ايد البنت

والحادثة التانية، لما بنت نزلت من المترو من غير شنطتها، وقعدت تصرخ وتنادي على الكابتن السواق علشان يقف، وهو ولا معبرها
والله اعلم لحقت شنطتها بعد كده... وللا كان فراق ابدي بينهم وبين بعض

والحادثة التالتة وهي الاسوأ من نوعها، لما بنت ياعيني كانت عايزة تخرج، ومش عارفة، جت صاحبتها بتشدها من ايديها علشان تخرجها، راح الباب قفل على نصها
تخيلوا دي!!!!!!!!!!!!! المترو ماشي ونص بنوتة طالعة من الباب
ربنا هو المنجي والله
(لا تعليق)

اه...... افتكرت حادثة تانية
بنت تانية صعبت عليا اوي، من كتر زوقها مرضتش تعمل زي باقي الناس وتزق وتشتم
حاولت تخرج بهدوء ماعرفتش، لسبب وجيه جدا
لان كل ماتيجي تخرج، تلاقي عاصفة شديدة محملة بالبشر عمالة تتكدس فوق بعضيها داخل الدودة ... احم ... اقصد داخل المترو
وكانت النتيجة الحتمية
البنت مخرجتش في المحطة اللي كانت عايزة تخرج فيها
والله اعلم خرجت اصلا، وللا المترة اتآنس بيها

والغريب جدا في الموضوع كله، ان الناس اللي بتزق وتدخل وبتعوق ناس تانية عن الخروج
هي نفسها الناس اللي لما بتيجي تخرج بتفضل تشتم في كل اللي جوا المترو
(تخيلوا المترو يحمل كام نسمة واحسبوها وشوفوا عدد الذنوب)
من الاخر كده.... لا تعليق!!!

بطلع انا من المترو بقا، كأني لسه جاية من خناقة
وحد بهدلني وقطعلي هدومي

وبلاش بقا اوصف شكلي بعد ما اخرج من المترو منعا للاحراج

ولسه بقا لما احكيلكوا على حكايتي في الكلية!!

------

البقية تأتي

انا و الشعب المصري .... و المترو

ايه رأيكو؟؟؟

تحبوا نتكلم في ايه؟؟

انا عن نفسي اعتقد ان مفيش كلام ولا حكايات ولا اقاصيص ليها مصدر، زي حكايات الشعب المصري

يعني مثلا انا هحكيلكوا عن يومي بطولة من اول مابصحى من النوم لحد ما برجع من الجامعة

انا طبعا بصحى من النوم وبفطر وبلبس وبنزل

وسيلة مواصلاتي الرئيسية المترو

ده لاني عمري ما تخيلت نفسي متشعبطة على سلم الاتوبيس او متشعلقة في رقبة واحد

طبعا بروح اشتري التذاكر، وبشتري اتنين ذهاب واياب، علشان اجنب نفسي اقف في طابور جمعية التذاكر بعد الظهر

بدخل التذكرة في الجهاز، ويا ربنا يكون هاديه ومايزمرش، يا ربنا يكون غضبان عليه ويركب راسه ومايعدينيش

وبقعد اتفرج على الشباب الواعد وهو بينط من فوق الجهاز، وفراحنين بشبابهم..... تقريبا مستكترين الجنية بتاع التذكرة

المهم... ماقولكوش بقا على المترو... الشعب كله عارف المترو، بيعد بعد من علامات مصر زيه زي الهرم

طبعا دخول المترو لازم بالاذن، والا عقوبة هي الزق والضرب بالكوع

انا شخصيا كنت بستأذن وعلشان كده كانوا بيشيلوني على كفوف الراحة، وبيدخلوني علشان اتعصر جوا براحتي
..............

والبقية تأتي